Woh Khushboo Bheja Karti Thi

Woh Khushboo Bheja Karti Thi Main Nazmein Likha Karta Tha,

Woh Hans K Ujala Karti Thi Main Subhein Likha Karta Tha,

 

Geeli Rait Pe Sahil K Doobte Hue Sooraj K Hamrah,

Woh Chup Chap Chalti Rehti Thi Main Sochain Likha Karta Tha,

 

Deep Wafa K Hote Thy Ya Shayed 2 Tarey Thy,

Woh Mujh Ko Dekha Karti Thi Main Aankhein Likha Karta Tha,

 

Tapti Dhoop Ka Rang Bhi To Phoolon Sa Ho Jata Hai,

Woh Zulfein Khola Karti Thi Main Shamein Likha Karta Tha,

 

Toot Kar Aksar Chahat Mein Rooth Kar Yunhi Ulfat Mein,

Woh Mujh Se Jeeta Karti Thi Main Haarein Likha Karta Tha,

 

Dono Ki Pehli Chahat Thi Dono Toot K Milte Thy,

Woh Waday Likha Karti Thi Main Qasmain Likha Karta Tha,

 

Chand Din Jab Aa Thehre Thy Us Ki Aur Meri Judai Mein,

Main Us K Hath Pe Pehron Phir Lakeerain Likha Karta Tha,

 

Jaan Se Pyare Se Shikwa Kya Khud Ko Ruswa Karna Tha,

Main Honton Pe Bas Chup Ki Muhrain Likha Karta Tha,

 

Din Mein Dard Ki Shidat Ko Main Hans K Seh Jata Tha,

Jo Us Ki Bin Kat'ti Theen Woh Raatein Likha Karta Tha,

 

Dasht-e-Wafa Mein Basne Ka Dekh Hasil Aye Sehra Neward,

Main Yaadein Likha Karta Hoon, Main Yaadein Likha Karta Tha...